رابطہ عالم اسلامی کی سعودی عرب کے جنوبی علاقے پر حوثی ملیشیا کے بیلسٹک میزائل حملوں کی شدید مذمت
مکہ مکرمہ:
رابطہ عالم اسلامی نے مملکت سعودی عرب کے جنوبی علاقے کی جانب حوثی ملیشیا کی طرف سے داغے گئے بیلسٹک میزائل حملوں کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس بزدلانہ دہشت گرد حملے کی سخت مذمت کرتے ہوئے کہا کہ یہ حملہ تمام دینی اقدار، بین الاقوامی قوانین اور انسانی روایات کی صریح خلاف ورزی ہے۔
ڈاکٹر العیسی نے رابطہ عالم اسلامی کی عالمی مجالس، اداروں اور تنظیموں، نیز اس کے زیرِ سایہ دنیا بھر کی مسلم اقوام کی جانب سے مملکتِ سعودی عرب کے ساتھ مکمل یکجہتی کا اعادہ کرتے ہوئے اس بات پر زور دیا کہ رابطہ ہر اس اقدام میں مملکت سعودی عرب کے ساتھ کھڑی ہے جو وہ اپنے امن، خودمختاری، اور اپنے شہریوں ومقیم افراد کی سلامتی کے تحفظ کے لیے اختیار کرے۔ انہوں نے اللہ تعالیٰ سے دعا کی کہ وہ مملکت سعودی عرب کو اس کی سرزمین، قیادت اور عوام سمیت ہر قسم کے شر اور آفت سے محفوظ رکھے۔
