رابطہ عالم اسلامی کی خیبر پختونخوا میں سکیورٹی چوکی پر دہشت گرد حملے کی شدید مذمت
مکہ مکرمہ:
رابطہ عالم اسلامی نے اسلامی جمہوریہ پاکستان کے صوبہ خیبر پختونخوا میں ایک سکیورٹی چوکی پر دہشت گرد حملے کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے ایک بار پھر اس عزم کا اعادہ کیا کہ رابطہ ہر قسم کی دہشت گردی اور تشدد کو، خواہ وہ کسی بھی شکل یا کسی بھی جواز کے تحت ہو، مکمل طور پر مسترد اور قابل مذمت سمجھتی ہے۔ آپ نے اسلامی جمہوریہ پاکستان کی حکومت اور عوام کے ساتھ مکمل یکجہتی کا اظہار کرتے ہوئے کہا کہ رابطہ ہر اس خطرے کے مقابلے میں پاکستان کے ساتھ کھڑی ہے جو اس کے امن، استحکام اور عوام کی سلامتی کو نقصان پہنچانے کا باعث بنے۔
ڈاکٹر العیسی نے جاں بحق ہونے والوں کے اہلِ خانہ اور تمام پاکستانی عوام سے دلی تعزیت وہمدردی کا اظہار کرتے ہوئے دعا کی کہ اللہ تعالیٰ مرحومین کو اپنی جوار رحمت میں جگہ دے اور انہیں جنت الفردوس میں اعلیٰ مقام عطا فرمائے۔
